ဆံပင်စတိုင် အမြဲလန်းဆန်းကြည့်ကောင်းလိုသော ပျိုမေတို့အတွက်

ဆံပင်စတိုင် အမြဲလန်းဆန်းကြည့်ကောင်းလိုသော ပျိုမေတို့အတွက်

by nang kha yea 06.10.2012

ဦးခေါင်းပေါ်က ဆံကေသာပုံစံဟာ ကိုယ်နဲ့ လိုက်ဖက်ရုံသာမက ပြုပြင်ထားတဲ့ ဆံပင်ပုံစံဟာ ဆံပင်အရောင်၊ ဆံပင်သား အမျိုးအစားတို့နဲ့ လိုက်ဖက်နေရင် လှပြီးသား ပျိုမေကို ပိုမိုလှပစေပါတယ်။ ဆံပင်ကျွတ်ပြီး ဆံပင်ပါးနေရင်၊ ဆံပင်အရောင်က မွဲခြောက်ခြောက် ဖြစ်နေရင်၊ ညှပ်ထားတဲ့ ဆံပင်က ပုံမလာဘူးဆိုရင်တော့ ရှိပြီးသား နဂိုအလှကိုတောင် မှေးမှိန်သွားစေ နိုင်ပါတယ်။ ဆံပင်ကို ဖြောင့်ထားတာ ပဲဖြစ်ဖြစ်၊ ကောက်ထားတာပဲဖြစ်ဖြစ် သင်သဘောကျတဲ့အတိုင်း ပြုပြင်ထားတဲ့ လက်ရှိ ဆံပင်စတိုင်ကို လန်းနေအောင် အောက်ပါနည်းတွေအတိုင်း ဂရုစိုက်ပေမယ်ဆိုရင်တော့ အမြဲကြည့်ကောင်းနေမှာပါ။

ဆံပင်အရောင်ဆိုးထားသူများအတွက်
ဆံပင်အရောင်ဆိုးထားတဲ့ ပျိုမဒီတို့အနေနဲ့ ဆံပင်အရောင် ကြာရှည်ခံပြီး တောက်ပနေဖို့အတွက် အောက်ပါနည်းလမ်းတွေကို လိုက်နာပေးပါ။


၁။ အရောင်ဆိုးထားတဲ့ဆံပင်တွေ (Color-treated hair) အတွက် သီးသန့်ထုတ်လုပ်ထားတဲ့ ရှမ်ပူနဲ့ ကွန်ဒီရှင်နာတို့ကိုသာ အသုံးပြုပေးပါ။ ရိုးရိုးပုံမှန် ရှမ်ပူတွေဟာ ဆိုးထားတဲ့ ဆံကေသာအရောင်ကို မြန်မြန်ပြယ်စေနိုင်ပါတယ်။

၂။ ထွက်လာတဲ့ ဆံပင်အရင်းကအရောင်ဟာ ဆံပင်အဖျားအရောင်နဲ့ လုံးဝသိသာခြားနားနေရင် ဆံပင်အရင်းနေရာကို ဆိုးနိုင်အောင် ဆံပင်အရောင်ဆိုး Mascara ကိုသုံးပါ။ သင့်မှာ ဆံပင်အရောင်ဆိုးနိုင်တဲ့ Mascara ကို သုံးပြီး ဆံပင်အရင်းနေရာကို ဆိုးပေးနိုင်ပါတယ်။
၃။ ဆံပင်ကို ခေါင်းမလျှော်ခင် မိနစ်အနည်းငယ်အလိုမှာ ရှလကာရည်တစ်ဆနဲ့ ကြက်သီးနွေးရေနှစ်ဆတို့ရောပြီး ဆံပင်သားပေါ် လိမ်းပေးပါ။ ဦးရေပြားခြောက်လုလုဖြစ်ခါနီမှာ ဦးရေပြားကို နှိပ်နယ်ပေးပါ။ ပြီးမှသာ ခေါင်းလျှော်ပေးပါ။

ဆံပင်ပုံသွင်းထားသူများအတွက်
ဆံပင်သားကို ဆံပင်လေမှုတ်စက် (Hair Dryer) သုံးပြီး ပုံသွင်းထားတဲ့သူတွေအနေနဲ့ ဆံပင်ပုံကြာကြာခံအောင် အောက်ပါနည်းလမ်းတို့က ကူညီနိုင်ပါတယ်။
၁။ ဆံပင်ကို ဦးခေါင်းအထက် ဖြန့်ပြီး အိပ်ပါ။ နံနက်ခင်းရောက်တဲ့အခါ ဆံပင်တွေကို ပုံမပျက်အောင် လက်နဲ့ အသာအယာဖွပေးပါ။
၂။ ဆံကေသာ ကျိုးကြေမှုကို ကာကွယ်နိုင်အောင် အိစက်ညက်ညောတဲ့ ခေါင်းအုံးပေါ်မှာ အိပ်စက်ပါ။
၃။ ရေချိုးတဲ့အခါ ဆံစပ်နေရာအထိ ခေါင်းစွပ် (Shower cap) စွပ်ပါ။ ခေါင်းစွပ် မစွပ်ခင်ပဝါတစ်စသုံးကာ ဦးခေါင်းကိုအုပ်ပေးပါ။
၎။ ရေချိုးပြီးတဲ့အခါမှာ ဆံပင်အရင်းနေရာတွေကို ဆံပင်လေမှုတ်စက် (Hair Dryer) နဲ့ မှုတ်ပေးပါ။
၅။ ဆံပင်လေမှုတ်စက်သုံးတဲ့အခါ ဆံပင်သားနဲ့ နီးနီးကပ်ကပ် မသုံးသင့်ပါ။
၆။ ဆံပင်လေမှုတ်စက် သုံးထားတဲ့အတွက် ဆံပင်သားမှာ ပရိုတင်းဓာတ် ဆုံးရှုံးသွားနိုင်ပါတယ်။ ဒါကြောင့် ခေါင်းလျှော်တဲ့အခါမှာ ပရိုတင်းဓာတ်ပါဝင်တဲ့ ခေါင်းလျှော်ရည်ကို သုံးပြီး ခေါင်းလျှော်ပေးပါ။

ဆံပင်ကို ကောက်ခြင်း၊ ဖြောင့်ခြင်း ပြုလုပ်ထားသူများအတွက်
ဓာတုပစ္စည်းပါဝင်တဲ့ ဆေးတွေသုံးပြီး ပြုပြင်ထားတဲ့အတွက် ဆံပင်သားဟာ အနည်းနဲ့အများတော့ ပျက်စီးထိခိုက်နေနိုင်ပါတယ်။ ဒါကြောင့် ဆံပင်ကောက်ထားရင် ဒါမှမဟုတ် ဖြောင့်ထားရင် အောက်ပါနည်းလမ်းတွေကို လိုက်နာပေးပါ။

၁။ နူးညံ့ပျော့ပျောင်းပြီး ဆံပင်ကျွတ်ခြင်းကို ကာကွယ်ပေးနိုင်တဲ့ ခေါင်းအုံးပေါ်မှာ အိပ်ပါ။ ယင်းခေါင်းအုံးမျိုးကို စူပါမားကတ်ဆိုင်ကြီးတွေမှာ ရနိုင်ပါတယ်။
၂။ ခေါင်းလျှော်တဲ့အခါတိုင်း ကွန်ဒီရှင်နာသုံးပါ။ အထူးသဖြင့် ပြုပြင်ထားတဲ့ ဆံပင်သားတွေမှာ အဖျားနှစ်ခွ ကွဲတတ်တဲ့အတွက် ဆံပင်အဖျားပိုင်းတွေကို ကွန်ဒီရှင်နာများများ သုံးပေးပါ။
၃။ ဆံပင်သား တောက်ပြောင်နေအောင် ထောပတ်သီးအမှည့်အနှစ်သား တစ်လုံးစာကို ကြိတ်ခြေပြီး ကြက်ဥ ဒါမှမဟုတ် ဘဲဥအနှစ်တစ်လုံးနဲ့ရောကာ ဆံပင်စိုစိုတွေပေါ် သုတ်ပေးပါ။ ထောပတ်သီးမှာ ဗီတာမင်၊ သတ္တုဓာတ်နဲ့ Essential Fatty Acid တို့ ပါဝင်တဲ့အတွက် ဆံပင်သားကို စိုပြည်တောက်ပနေစေပါတယ်။ ကြက်ဥ၊ ဘဲဥအနှစ်မှာ ပရိုတင်းဓာတ်ပါဝင်တဲ့အတွက် ဆံပင်သား ကျန်းမာစေပါတယ်။ မိနစ် ၂၀ လောက်ကြာမှသာ ရေနဲ့ စင်အောင် ဆေးကြောပေးပါ။

စနစ်ကျသော ခေါင်းလျှော်နည်း
ဆံပင်ကို ရှမ်ပူနဲ့ ခေါင်းလျှော်တဲ့အခါ နည်းလမ်းတကျ လျှော်တတ်ရင် ဆံပင်ကျွတ်ခြင်း လျော့ပါးပြီး ဆံသားကြီးထွားရှင်သန်ကာ ဦးရေပြား ကျန်းမာစေပါတယ်။ ဆံပင်ကို မှန်မှန်ကန်ကန် ခေါင်းလျှော်တတ်တဲ့နည်းလမ်းကို လူအနည်းစုကသာ သိရှိပြီး တကယ်လိုက်နာကြကြောင်း ဟောလီးဝုဒ် ဆံပင်ဒီဇိုင်နာ ဂျော့ကာရိုးက ဆိုပါတယ်။ စနစ်တကျ ခေါင်းလျှော်တာက ဆံပင်စတိုင်ကို အမိုက်စားဖြစ်စေရုံသာမက ဆံပင်သားကို ကျန်းမာသန်စွမ်းစေပါတယ်။

၁။ ခေါင်းမလျှော်ခင် ဆံပင်ကို ဦးခေါင်း ရှေ့ဘက်မှ နောက်ဘက်သို့ ဝက်မှင်ဘီးနဲ့ ဖြီးပေးပါ။ ဆံပင်ဖြီးပေးတာက သွေးလှည့်ပတ်မှု ကောင်းစေတဲ့အပြင် ဆံကေသာမှ ကပ်ညှိနေတဲ့ ဆံပင်သုံးပစ္စည်းတွေကို လျော့ပါးသွားစေပါတယ်။
၂။ ကြက်သီးနွေးရေနဲ့ ခေါင်းလျှော်ပါ။ ရေပူသုံးရင် ဆံပင်သားမှာရှိတဲ့ အကာအကွယ်ဆီတွေ ကင်းဝေးသွားနိုင်ပါတယ်။ ခေါင်းလျှော်တဲ့အခါ လည်ကုပ်အစပ်မှ စကာ နဖူးအထိ လျှော်သွားပါ။
၃။ ဦးရေပြားဆီ အာဟာရဓာတ်ရောက်ရှိစေဖို့ အနည်းဆုံး သုံးကြိမ်ခန့် နှိပ်နယ်ပေးပါ။
  
၎။ မိမိရဲ့ ဆံပင်အမျိုးအစားအလိုက် သင့်တော်ကောင်းမွန်တဲ့ ရှမ်ပူရွေးပါ။
၅။ ခေါင်းလျှော်ပြီးတဲ့အခါ ကွန်ဒီရှင်နာ လိမ်းပါ။
၆။ အချိန်ရရင် ရေနွေးငွေ့ခံယူထားတဲ့ တစ်ဘက်ကို ဦးခေါင်းပေါ်ကို အုပ်ပေးပါ။ ရေနွေးငွေ့ဟာ ကွန်ဒီရှင်နာကို ဦးရေပြားနဲ့ ဆံကေသာဆီ စိမ့်ဝင်အားကောင်းမွန်စေပါတယ်။
၇။ ပြီးရင် ရေအေးနဲ့ ဆေးချပေးပါ။ ဒီနည်းလမ်းဟာ ဆံကေသာအမျှင်တွေကို သန်စွမ်းစေကာ ဆံပင်သား တောက်ပပျော့ပျောင်းစေပါတယ်။

ရေးသားသူ>>>>>လင်းလက်ကြယ်စင်