ချစ်စရာ့ဆံပင်လေးတွေဖြစ်စေချင်လို့ပါ

by ပိုပိုဇော်(သဘာဝအားအင်) on Friday, January 4, 2013 at 1:54pm 

ချစ်စရာ့ဆံပင်လေးတွေ

၁။ Silicon သုံးပြီး ဆံပင်ထူအောင် ဖန်တီးပါ။

ဆံပင်နဲ့ ပတ်သက်ပြီး မိန်းကလေးတွေ အများဆုံး ညည်းကြတဲ့အထဲမှာ ဆံပင်ပါးခြင်းကလည်း ပြဿနာတစ်ခုပါ။ အဲဒါ ကို ဘယ်လိုဖြေရှင်းရမယ်ဆိုတာကို သိတဲ့မိန်းကလေးကလည်း နည်းနည်းပါးပါးပဲ ရှိပါတယ်။ ခေါင်းလျှော်ပြီးတိုင်း ဆံပင် ပျော့ဆေးတွေကို အများကြီးသုံးတာဟာ ဆံပင်ကို အုံမထူစေဘဲ နူးညံ့ပျော့ပျောင်းစေတာပဲ ရှိပါတယ်။ ကောင်းတာကတော့ Silicon ပါတဲ့ ဆံပင်ပျော့ဆေးကို ရွေးသုံးပါ။ Silicon လို့ ပြောလိုက်တာနဲ့ သင်ဘာကို စဉ်းစားမိပါသလဲ။ 

Silicon ပေါင်း မြောက်များစွာရှိပါတယ်။ ရော်ဘာအတုလုပ်တဲ့ Silicon ၊ မိတ္တူကူးရာမှာသုံးတဲ့ Silicon ရည်၊ အိမ်ကို ပေါ်လစ်တိုက်တဲ့ Silicon ရည်နဲ့ နောက်ဆုံးကုန်ကုန်ပြောရရင် အမျိုးသမီးတွေ ရင်သားလှပအောင်ထည့်တဲ့ Silicon ဆိုပြီး အမျိုးမျိုးရှိပါတယ်။ Silicon ပါရင် ဘူးပေါ်မှာ Dimethicone or Cyclomethicone လို့ ရေးထားပါလိမ့်မယ်။ Silicon ဟာ ဆံပင်တစ်မျှင်ခြင်းစီ ပေါ်မှာ အလွှာပါးပါးလေးအဖြစ်နဲ့ရှိနေတဲ့အတွက် ဆံပင်အုံကို ပိုထူလာစေပါတယ်။ အဆီများပြီး စေးကပ်နေတာမျိုးလည်း မရှိပါဘူး။ ရေဆေးချပြီးရင်တောင်မှ Silicon အလွှာက ဆံပင်သားပေါ်မှာ ဆက်ပြီးရှိနေတဲ့အတွက် သင့်ဆံပင်ကို အုံ ပိုကောင်းတယ်လို့ ထင်ရစေမှာပါ။

၂။ ဆံနွယ်လေးများ သန်စွမ်းနက်မှောင်လှပစေရန် ငါးစားပါ။ သီဟိုဠ်စေ့၊ ဗာဒံစေ့၊ မြေပဲနဲ့ သစ်ချသီးများစားပေးပါ။

အဲဒီအစားအစာတွေက သင့်ဆံပင်ကို ပိုမိုကျန်းမာစေပြီး ဆံပင်ပြတ်တာ၊ ကျွတ်တာမျိုးကို ကာကွယ်ပေးပါတယ်။ ပရိုတင်းဓာတ်နဲ့ အိုမီဂါသရီးဓာတ် (Omega-3 Fatty Acid)တွေ အပြည့်အ၀ပါဝင်တဲ့အတွက် ဦးရေပြားကိုလည်း အား ကောင်းစေပါတယ်။ အရွက်စိမ်းစိမ်းတွေဖြစ်တဲ့ ကိုက်လန်၊ ကန်စွန်း၊ ဟင်းနုနယ်တွေ၊ ပဲမျိုးစုံနဲ့ မုန်လာဥနီတွေမှာ ပါဝင်တဲ့ အာဟာရဓာတ်တွေကလည်း ဆံပင်တွေအတွက် ကောင်းမွန်ပါတယ်။ သတိထားရမှာကတော့ တစ်ခါတလေ ပိန်ချင်ဇောနဲ့ အစား အရမ်းရှောင်တာမျိုးပါ။ သွပ်ဓာတ် (Zinc)၊ ဗီတာမင်နဲ့ ပရိုတင်းဓာတ်ချို့တဲ့ရင် ဆံပင်တွေ မတရားကျွတ်တာ၊ ပါးပြီး ကျွတ်ဆတ်တာတွေ ဖြစ်လာပါလိမ့်မယ်။

၃။ ဆံနွယ်လေးတွေ တောက်ပြောင်လင်းလက်နေအောင် ကြက်သီးနွေး ရေနွေးလေးကိုပဲသုံးပါ။

တစ်ခါတလေ ရာသီဥတုအေးတာကြောင့် ဒါမှမဟုတ် ရေနွေးသုံးရင် ဆံပင်ပျော့ဆေး မြန်မြန်စင်တယ်ဆိုတဲ့ အယူအဆ ကြောင့် ရေနွေးနဲ့ခေါင်းလျှော်လေ့ရှိကြပါတယ်။ လူတွေရဲ့ဦးရေပြားကထွက်တဲ့အဆီတစ်မျိုးက ဆံပင်ကို သဘာဝအလျောက် နူးညံ့ပျော့ပြောင်းစေပြီး တောက်ပနေစေပါတယ်။ ရေနွေးသုံးစွဲခြင်းကြောင့် ဦးရေပြားမှာ သဘာဝအဆီဓာတ်ကို ခန်းခြောက်သွားစေပြီး မွဲခြောက်ခြောက်နဲ့ ကြည့်လိုက်တာနဲ့ မကောင်းမှန်း သိသာတဲ့ ဆံပင်မျိုး ဖြစ်သွားစေပါတယ်။ ဒါကြောင့် ခေါင်းလျှော်ရင် ကြက်သီးနွေး ရေနွေးလေးကိုပဲ သုံးပါ။ ပြီးရင် ခေါင်းလျှော်တိုင်းမှာ ဦးရေပြားကို လက်ထိပ်လေးတွေနဲ့ ညင်သာစွာ နှိပ်နယ်ပေးခြင်းဖြင့် သဘာဝအဆီ ထွက်လာပါလိမ့်မယ်။

၎။ အဖျားနှစ်ခွကွဲနေတဲ့ ဆံပင်ကို ပရိုတင်းသုံးပြီး ပြန်ကောင်းအောင် လုပ်ပါ။

ဆံပင်တစ်ချောင်းမှာ အလွှာတွေအများကြီးရှိတဲ့အထဲက အပေါ်ဆုံးကနေ ကာကွယ်ပေးနေတဲ့အလွှာကို Cuticle လို့ ခေါ်ပါတယ်။ လှချင်စိတ်နဲ့ ဆံပင်ကို ခဏခဏ ပုံစံပြောင်းတဲ့အခါ ဖြောင့်စက်ရဲ့ အပူဒဏ်၊ အရောင်ချွတ် ဆေးရဲ့ဒဏ်၊ ဆိုးဆေးမှာပါတဲ့ ဓာတုဗေဒပစ္စည်းရဲ့ဒဏ်ကို ဆံပင်က လှိမ့်ပိန့်ခံရလေ့ရှိပါတယ်။ အခံရဆုံးကတော့ အပေါ်ဆုံးမှာရှိတဲ့ Cuticle လွှာလေးပါပဲ။ အဲဒီအလွှာလေး ပျက်စီးသွားတာကို နှစ်ခွဖြစ်တယ်လို့ ခေါ်ကြတာပေါ့။ ဒါပေမယ့် ၀မ်းသာစရာ ကောင်းတဲ့ အချက်က ပရိုတင်းဓာတ်ပါတဲ့ ခေါင်းလျှော်ရည်တွေ၊ ဆံပင်ပျော့ဆေးတွေကို တီထွင်ထုတ်လုပ်ထားတာပါ။ ပရိုတင်းဓာတ်က ဆံသားတွေထဲထိ ထိုးဖောက်ဝင်ရောက်ပြီး နှစ်ခွကွဲနေတာကို နောက်တစ်ခါ ခေါင်းမလျှော်ခင်အထိ ပြန်လည်ကောင်းမွန်စေပါတယ်။ ဒါ့ကြောင့် မှန်မှန်သုံးပေးဖို့တော့ လိုပါတယ်။

၅။ ဗောက်ပျောက်အောင် ဆီနဲ့မပွတ်ပါနဲ့။

ဦးရေပြားမှာ စွဲကပ်တဲ့ မှိုတစ်မျိုးကြောင့် ဦးရေပြားရောင်ယမ်းပြီး ဗောက်တွေဖြစ်ရတာပါ။ ဒါပေမယ့် တချို့က ဗောက် ကိုဦးရေပြားခြောက်လာလို့ ဖြစ်တာလို့ထင်တတ်ကြပါတယ်။ ဗောက်ပျောက်အောင်လို့ အဆီနဲ့ဦးရေပြားကို ပွတ်ပြီးလိမ်းတာ က ဦးရေပြားရောင်ယမ်းတာကို ပိုဆိုးစေပြီး အဖြူဖတ်တွေ ပိုကွာလာပါတယ်။ ဒါ့ကြောင့် ဗောက်ပျောက်ချင်ရင် မှိုသတ်ဆေး ပါဝင်တဲ့ Hacneal လို ခေါင်းလျှော်ရည်မျိုးကို သုံးပါ။ ဒါမှမဟုတ် အရေပြားဆရာဝန်နဲ့ တိုင်ပင်ဆွေးနွေးပြီး ဆရာဝန် ညွှန်ကြားတဲ့ ပိုးသတ်ဆေးကို သုံးပါ။ သတိထားရမှာက အဲဒီခေါင်းလျှော်ရည်သုံးပြီးတိုင်း သေချာပြောင်အောင် ဆေးဖို့ပါ။

၆။ အပူအရမ်းပြင်းတဲ့ Hair Dryer တွေ မသုံးပါနဲ့။

အပူရှိန်ပိုပြင်းတဲ့ Dryer တွေကိုသုံးရင် ဆံပင်အခြောက်ခံဖို့ ပေးရတဲ့ အချိန်နည်းသွားမယ်လို့ သင်ထင်မိနေပါလိမ့်မယ်။ ဒါပေမယ့် Dryer တွေကို နှိုင်းယှဉ်လေ့လာချက်အရ ဆံပင်ကို ခြောက်သွေ့သွားဖို့ လိုအပ်တဲ့ အချိန်ဟာ Dryer အမျိုးအစား အကုန်လုံးအတွက် အတူတူလောက်ပဲကျပါတယ်။ မတူတာက တချို့ Dryer တွေက အသံပိုဆူညံတာပဲရှိပါတယ်။ ဒါကြောင့် Dryer ကို ၀ပ်အားနည်းနည်းပဲ လိုမယ့်အမျိုးအစားကို ရွေးသုံးပါ။ (၁၅၀၀) ၀ပ်လောက်က အတော်ပါပဲ။ ပြီးတော့ Dryer တွေ ခဏခဏ မှုတ်ပြန်ရင်လည်း ဆံပင်ကျွတ်နှုန်းများလာပါတယ်။ ဒါကြောင့် တတ်နိုင်သမျှ သဘာဝ လေနဲ့ပဲ အခြောက်ခံပြီး Dryer သုံးတဲ့အခါမှာလည်း မီးအေးအေးနဲ့ပဲ မှုတ်ပါ။

၇။ ဆံပင်ကျွတ်သက်သာအောင် ခေါင်းခဏခဏမဖြီးပါနဲ့။

ဆံပင်ကျွတ်တယ်ဆိုတာ ဆက်မရှည်လာတော့ဘဲ သက်တမ်းကုန်သွားတဲ့ ဆံပင်တွေ ကျွတ်ကုန်တာပါ။ ပုံမှန်ဆိုရင် တစ်နေ့ကို ဆံပင်အချောင်း (၅၀)ကနေ (၁၀၀)လောက် ကျွတ်တတ်ကြပါတယ်။ ခေါင်းခဏခဏ ဖြီးလွန်းရင်တော့ ဆံပင်တွေ ပိုပြတ်၊ ပိုကျွတ်တတ်ပါတယ်။ လူတွေပြောပြောနေတဲ့ တစ်နေ့ကို ခေါင်းအချက် (၁၀၀) ဖြီးပါဆိုတာကို မယုံပါနဲ့။ ဆံပင်ကျွတ် ပိုသက်သာအောင်လို့ ထိပ်မှာဘုသီးသေးသေးလေးတွေပါတဲ့ ၀က်မှင်ဘီးကိုသုံးပါ။ ပြီးတော့ ဆံပင်ရေစိုနေတုန်း ခေါင်းမဖြီး ပါနဲ့။

၈။ ဆံပင်တွေ ပျက်စီးစေတဲ့ ဆံပင်စတိုင်လ်တွေကို အတတ်နိုင်ဆုံး ရှောင်ပါ။

ဆံပင်ကို နောက်လှန်ဖြီး မြင့်မြင့်စီးခြင်းနဲ့ ကျစ်ဆံမြီးကျစ်ခြင်းတွေက ဆံပင်တွေကို ပြတ်စေပြီး ဆံပင်အမြစ်တွေကိုပါ ထိခိုက်စေနိုင်ပါတယ်။ စီးတာကြာလာရင် ဆံပင်ကို ဆောင့်ဆွဲနေသလိုဖြစ်ပြီး ပိုကျွတ်စေပါတယ်။ ဒီနေ့ခေတ်မှာ အရမ်း ခေတ်စားလာတဲ့ Hair Extension ခေါ် ဆံပင်တု တပ်တာကလည်း ဤနည်းလည်းကောင်းပါပဲ။ ဆံပင်ထွက်လာတဲ့ မွေးညှင်း ပေါက်လေးတွေကို ဒဏ်ဖြစ်စေပါတယ်။ အရေပြားဆရာဝန်တွေက ဆံပင်တုကို (၃)လထက် ပိုမတပ်သင့်ဘူးလို့ အကြံပေး ထားပါတယ်။ ပြီးတော့ ရေစိုဆံပင်ဟာ အရမ်းကို ပျက်စီးလွယ်တဲ့အတွက် ဆံပင်စိုကို ပိုနီတေးစီးတာ၊ ကျစ်ဆံမြီးကျစ်တာ ဘယ်တော့မှ မလုပ်ပါနဲ့။

၉။ Brand... Brand... Brand

တစ်လတာ အသုံးစရိတ်တွေ မြင့်တက်စေတဲ့ အကြောင်းအရင်းတွေထဲမှာ Brand ကိုမှ သုံးချင်တာလဲ ပါပါတယ်။ ဈေး ကြီးတဲ့ Branded ပစ္စည်းတွေမှာ သဘာဝဆေးဖက်ဝင်ပစ္စည်းတွေ ပါနေနိုင်ပါတယ်။ ဒါပေမယ့် သင့်ဆံပင်ကိုတော့ ပိုပြီး စတိုင်ကျကျ လှပလာစေမှာ မဟုတ်ပါဘူး။ အမေရိကန်နိုင်ငံမှာရှိတဲ့ စားသုံးသူစစ်တမ်းအဖွဲ့က မိန်းကလေး (၁၇၀၀)ဦးကို ခေါင်းလျှော်ရည် အမျိုးမျိုးသုံးစေပြီး ပြန်စန်းစစ်ကြည့်တဲ့အခါ ဈေးကြီးတဲ့ ခေါင်းလျှော်ရည်တွေရဲ့ စွမ်းဆောင်နိုင်မှုက ဈေးပေါ တဲ့ ခေါင်းလျှော်ရည်တွေနဲ့ ဘာမှမကွာခြားပါဘူး။

အဲဒါဆို ဘယ်လိုအမျိုးအစားကို ရွေးသုံးသင့်ပါသလဲ။ သင့်ဆံပင်နဲ့ အဆင်ပြေဆုံး ခေါင်းလျှော်ရည်နဲ့ ပျော့ဆေးကိုသာ ရွေးပါ။ အဆီများတဲ့ ဆံပင်လား၊ ပါးတဲ့ဆံပင်လား၊ ဆေးဆိုးထားတဲ့ ဆံပင်လား ဆိုတာတွေကို အခြေခံပြီး ရွေးပါ။

၁၀။ ဆံပင်ဖြူတွေ ဆေးဆိုးတဲ့အခါ အားပျော့တဲ့ဆိုးဆေးတွေကိုပဲ သုံးပါ။

အသက်ကြီးလာတဲ့အခါ ဆံပင်ဖြူလာရုံသာမက အားပိုနည်းပြီး အရှည်နှုန်းလဲ နှေးကွေးလာပါတယ်။ အဲဒီတော့ ငယ်ရွယ်စဉ်တုန်းကလို ဆံပင်သားပျက်စီးသွားတဲ့အခါ ညှပ်ထုတ်ပစ်လို့လဲ မရတော့ပါဘူး။ ဒါကြောင့် ဆံပင်ဖြူတွေ ဆေးဆိုး မယ်ဆိုရင် ဓာတုဗေဒ အပျော့စားတွေသာ ပါဝင်တဲ့ ဆိုးဆေးကိုပဲ သုံးသင့်ပါတယ်။

၁၁။ ဆောင်းရာသီမှာ ဆံပင်တွေ မွဲခြောက်ကာ လေထဲမှာ ပျံဝဲမနေအောင် ပျော့ဆေးမှန်မှန် သုံးပေးပါ။

စွတ်စိုထိုင်းမှိုင်းတဲ့ ရာသီဥတုကြောင့် ဆံပင်မွဲခြောက်ကြွပ်ရွပြီး ကောက်လာတတ်ပါတယ်။ စိုထိုင်းဆနည်းရင်တော့ ဆံပင်မှာ လျှပ်စစ်စီးမှု ပိုများပါတယ်။ ဒါကြောင့် ဆောင်းရာသီမှာ၊ အရမ်းပူပြီး ခြောက်သွေ့တဲ့အချိန်တွေမှာ ဆံပင်တွေ လျှပ်ကူးနှုန်းမြင့်ပြီး ခေါင်းဖြီးလိုက်တိုင်း လေထဲမှာ ပျံဝဲနေတာပေါ့။ ဒီလိုမဖြစ်ချင်ရင် အဲဒီအချိန်တွေမှာ ဆံပင်ပျော့ဆေး မှန်မှန်သုံးပေးပါ။ ဓာတုဗေဒပစ္စည်းတွေနဲ့ ထိတွေ့ဖန်များလို့ ရာသီမရွေး မွဲခြောက်ခြောက်ဖြစ်နေတဲ့ ဆံပင်တွေအတွက်တော့ PH ပမာဏကို ထိန်းညှိပေးနိုင်မယ့် ခေါင်းလျှော်ရည်တွေက အသုံးတည့်ပါတယ်။

၁၂။ ဆံပင်ကောက်ထားရင် ဘရပ်ရ်ှဘီးတွေနဲ့ မဖြီးပါနဲ့။

ကောက်ထားတဲ့ ဆံပင်တွေဟာ ပုံမှန်ဆံပင်တွေထက် ပိုပြီးတော့ ခြောက်သွေ့လွယ်ပြီး ပြတ်လွယ်ပါတယ်။ ဒါကြောင့် ဘရပ်ရ်ှဘီးတွေနဲ့ အသွားစိပ်စိပ်ဘီးတွေနဲ့ ဖြီးမယ့်အစား လက်ချောင်းတွေနဲ့ပဲဆွဲချပြီး ဖြီးပေးပါ။ ဆံပင်ကောက်ထားတဲ့ သူတွေ ဆံပင်ပျော့ဆေးသုံးမယ်ဆိုရင် ဘူးပေါ်မှာ Polyvinylpyrolidone ဆိုတဲ့ စာတမ်းပါမပါ ဖတ်ကြည့်ပြီးမှ ၀ယ်ပါ။ အဖြောင့်သမားတွေကလည်း နေ့စဉ်ဖြောင့်စက်သုံးပြီး ဖြောင့်နေတာမျိုး၊ ခဏခဏ စက်ဆွဲတာမျိုး မလုပ်သင့်ပါဘူး။

၁၃။ ဆံကေသာတွေကို နေရောင်ခြည်ဒဏ်မှ ကာကွယ်ပေးပါ။

နေရောင်ခြည်က အသားအရေကို ထိခိုက်စေသလို ဆံပင်ကိုလည်း အလွတ်မပေးပါဘူး။ နေပူထဲထွက်ရဖန်များရင် ဆံပင်တွေ မွဲခြောက်ခြောက် ဖြစ်လာပါလိမ့်မယ်။ အရောင်ဆိုးထားတဲ့ဆံပင်ဆိုရင် ပိုတောင် ဆိုးပါသေးတယ်။ ဒါကြောင့် SPF ပါဝင်တဲ့ ဆံပင်ဖြန်း စပရေးကို ၀ယ်ပါ။ ဒါမှမဟုတ် ဦးထုပ်/ထီး ဆောင်းထားပါ။ နွေရာသီမှာ ဆံပင်အောက်ဖျားကို တိပေးရင် ပိုပြီးကျန်းမာလတ်ဆတ်တဲ့အသွင် ပေါက်လာစေပါတယ်။

၁၄။ ရေမကူးခင် ခေါင်းလျှော်ပါ။

ရေကူးပြီးရင် ခေါင်းလျှော်ရမယ်ဆိုတာကို လူတိုင်းသိနားလည်ကြပါတယ်။ ရေမကူးခင်မှာလည်း ခေါင်းလျှော်ပေးခြင်း အားဖြင့် ရေကူးကန်ထဲမှာ မထည့်မဖြစ်ထည့်ရတဲ့ ကလိုရင်းကြောင့် ဆံပင်သား ပျက်စီးတာကို ကာကွယ်နိုင်ပါလိမ့်မယ်။ တကယ်လို့ ခေါင်းလျှော်ဖို့ အချိန်မပေးနိုင်ရင် ဆံပင်ကို ရေ၀အောင် လောင်းချလိုက်ပါ။ ဆံပင်သားက ရေဓာတ်ပြည့်ဝနေရင် ရေကူးကန်ထဲက ကလိုရင်းဓာတ်ကို မစုပ်ယူနိုင်တော့ပါဘူး။ ရေကူးပြီးလို့လျှော်တဲ့အခါမှာလည်း PH မျှခြေကို ထိန်းညှိပေးတဲ့ ခေါင်းလျှော်ရည်ဘူးကို ရွေးလျှော်ပါ။

၁၅။ ဆံပင်ကို ဘာမှမလုပ်ဘဲ ခဏလောက် အနားပေးပါ။

ကျန်းမာသန်စွမ်းလှပတဲ့ ဆံပင်တွေဖြစ်စေဖို့ အကောင်းဆုံးလုပ်ပေးနိုင်တဲ့ အရာကတော့ ဘာမှမလုပ်ပါနဲ့။ ခေါင်းဖြီး လွန်းတာ၊ Dryer မှုတ်တာ၊ ဆေးဆိုးတာ၊ ဖြောင့်/ကောက်တာ အကုန်လုံးက ဆံပင်တွေကို ပျက်စီးစေပါတယ်။ ကုန်ကုန် ပြောရရင် မျက်နှာသုတ်ပ၀ါနဲ့ ကြမ်းကြမ်းသုတ်တာတောင်မှ ဆံပင်ဖွာစေပါတယ်။ ဒါကြောင့် သင့်စိတ်ထဲမှာ သင့်ဆံပင်တွေ ပျက်စီးနေပြီလို့ထင်ရင် ဆံပင်ကို ဘာမှမလုပ်ဘဲ ခဏအနားပေးလိုက်ပါ။ ပျက်စီးနေတဲ့ ဆံပင်တွေ ကျွတ်ကျသွားရင် ကျန်းမာ သန်စွမ်းတဲ့ ဆံပင်တွေ ပြန်ပေါက်လာပါလိမ့်မယ်။

၁၆။ ဆံကေသာရဲ့ပြောင်းလဲမှုတွေကို အမြဲတမ်း ဆန်းစစ်ပါ။

ဆံကေသာအရင်နဲ့ မတူဘဲ ပြောင်းလဲလာရင် (ဥပမာ-ဆံပင်တွေ ကြွပ်ဆတ်လာရင်၊ ရုတ်တရက်အရမ်းကျွတ်လာရင်) ကျန်းမာရေးပြဿနာ တစ်ခုခုရှိလို့ ဖြစ်နိုင်ပါတယ်။ သိုင်းရွိုက်ရောဂါ၊ သံဓာတ်ချို့တဲ့ခြင်းနဲ့ တချို့သောဆေးဝါးတွေက ဆံပင် ကျွတ်စေပါတယ်။ တကယ်လို့ ဆံပင်က ရုတ်တရက် ပြောင်းလဲလာတယ်လို့ သင်ထင်ရင် ဆရာဝန်နဲ့ ပြသတိုင်ပင်ပေးပါ။

ခင်ကံ့ကော်

 Ref credit>>>နိုဝင်ဘာလထုတ်ကျန်းမာရေးမဂ္ဂဇင်းမှ